REFLEXIÓN: APRENDIZAXE E SERVIZOS COMUNITARIOS.

Uns dos aspectos que considero máis importantes á hora de vivir en sociedade son a solidariedade e o cooperativismo, os cales están moi presentes na ensinanza do IES Miguel Catalán de Coslada. Este centro aposta por promover a interacción do alumnado co seu entorno e pola súa colaboración para mellorar a súa cidade, xa sexa intentando incrementar a doazón de sangue, apoiando a protectora local de animais con diferentes tarefas ou organizando días pola solidariedade.

            Ademais, o centro conta con axentes externos, como ONGs ou o propio Concello, que colaboran para mellorar a experiencia educativa do alumnado e para formalos en temas como a resolución de conflitos ou a igualdade de xénero, entre outros. Ambos son temas de actualidade que precisan de máis presenza nos centros educativos, xa que son de vital importancia para evitar situacións tan graves como os casos de violencia de xénero ou de bullying e para a mellora da sociedade, en xeral.

            Persoalmente, vexo esta metodoloxía como un apoio mutuo, xa que o alumnado axuda a mellorar a situación do pobo no que se sitúa a través dos Proxectos de Aprendizaxe Servicio, mentres que axentes externos, como ONGs ou o Concello, colaboran co centro para que estes poidan educarse en valores. O alumnado, a partir destas intervencións, tamén aprende a traballar en equipo e a ter en conta os intereses e ideas de outros compañeiros e compañeiras, xa que están constantemente a traballar en grupo.

Finalmente, menciónase que o centro organiza debates e lecturas semanais con invitados externos a este, o cal ten dous claros aspectos positivos, entre outros. O primeiro é o feito de que o alumnado obtén diferentes puntos de vista sobre os temas a tratar e opinións alleas ao centro e ao seu círculo de afinidades habitual, o cal pode espertar a súa capacidade de pensamento crítico. O segundo relaciónoo máis coa súa capacidade de comunicar, de facerse oír e de expresar as súas opinións e pensamentos de xeito claro e sen medo ante un público que non coñece, o cal pode asustar nun principio.

A modo de conclusión, gustaríame dicir que o traballo que se realiza neste centro para incluír ao alumnado na cidade onde viven me parece moi beneficioso para eles nun futuro, xa que aprenderán dende moi cedo a colaborar, a ser solidarios e a prestar axuda a quen máis a precisa, o cal moitas veces non é o habitual a pesar de ser absolutamente necesario.